SHILLONG: Indian Constitution-ni Sixth Schedule-ko taridapna sienggipa Constitution (One Hundred & Twenty-Fifth Amendment) Bill 2019-o salgro salaram jolo donggipa dam 10 autonomous council (AC)-rangni nanganirangko chu·sokatna gita Bristibar salo, Union Home Minister Amit Shah ku·rachakaniko on·angaha.
Union Home Minister-ko New Delhi-o grongani ja·man kobor ra·timgiparangna talate on·angengon, Bristibar salo uamangni janape on·gipa pilak nanganirangkon chu·sokate on·na Union Home Minister ku·rachakaniko on·ataha ine TIPRA Motha-ni dilgipa Pradyot Kishore Manikya Debbarma parakataha.
Debbarma-ni aganani gitade, gipin sorkarirang baksa songgigrikgipa pilak kamrangkoba uamang mande ra·gen maina ian BJP ba Congress dolni kam ong·ja indiba India sorkarini kaman ong·a ineba Union Home Minister, uamangna parakataha.
“Union Home Minister chingni nangnikanirangko niatna ku·rachakaniko on·ahani gimin chinga kusi ong·a,” ine ua aganaha.
Constitution (One Hundred & Twenty-Fifth Amendment) Bill 2019-ara Meghalaya, Assam, Mizoram ba Tripura-ni Autonomous Council (AC) ba Territorial Council (TC)-rangnade dingtangnaba gnang ineba Debbarma aganskaaha.
“Indake ong·genchimoba chingni pilak neng·nikanirangkon committee, dingtang dingtang dake namatna ku·rachakahani gimin ian an·chingna namgni ong·gen. Chinga kamrangko chu·sokatanio maming golmal ong·anirangko nangnikja indiba chingni manderangna aro jattangtangna bilrangkosa on·na ska,” ine TIPRA Motha-ni dilgipa aganaha.
Indake ong·engon, Union Home Ministry-ni songna sienggipa committee-ko Union Home Minister of State Nityanand Rai dilgen ine KHADC-ni CEM Pyniaid Sing Syiem parakatskaaha.
Union Home Minister baksa agangrikanirang chu·sokgipa ong·aha ineba ua an·tangni kusi ong·aniko parakataha.
Salgro salaram jolni dam 10 AC aro TC-ni dilgiparang, August-ni 10 tariko Shillong-o tom·enba Constitution-ni Sixth Schedule-ko taridapna sienggipani bidingo chanchirimangtaigen ineba Syiem parakataha.