SHILLONG: District Institute of Education and Training (DIET) Nongstoin-ni capacity-ko baridapatna National Council for Teacher Education (NCTE)-o sing·atgen aro Ministry of Educaction-oniko tangka paisani gita dakchakaniko bi·atgen ine Education Minister Rakkam Sangma aganaha.
Meghalaya Legislative Assembly-ni Autumn Session-ko ong·atani bon·kamgipa salo Rakkam indine aganaha, “NCTE -ni niam gita, da·o donggipa ge 50 seat-ni capacity-ko baridapatna man·ja, maina DIET-ko a·bachengataon, unit 1-kosan ra·chakaha. Indiba ia mamlao NCTC baksa agangrikgen aro India sorkarini Education Ministry-ko dakchakna mol·mole nigen.”
West Khasi Hills Nongstoin-o DIET-ko a·bachengataon, D.El.Ed course-na seat capacity-ko NCTE-ni dongimin niam gita ge 50 seat-ko donaha. Uandake candidate-rangko merit list-o pangchakesa seoka. Seat-ko Khasi, Jaintia aro Garo-na block-ni gita chama ine Education Minister aganaha.”
Iarangni gisepon Education Minister, DIET Nongstoin-ni infrastructure-ko rikanio NCTE-ni dongimin niamko ja·rika ine talataha. Minggipin DIET Nongstoin-ko Samagra Shiksha Abhiyan 2024-25-ni gita Centre fo Excellence (CoE) ine parakataha. Ian infrastructure-ko a·palbatatna dakchakgipa ong·gen. Iarangna agreba a·doko skia man·gipa ba qualified teacher-rangko nangnikengani gimin bilsi 4-ni Integrated Teacher Education Programme (ITEP)-ko parakatna miksongani donga.
