SHILLONG: Adita salrangna skang, Philippines a·songni Moldova aro India a·songo ong·atanggipa World Arm Wrestling Championship-o medal-rangko chebagipa Meghalaya a·dokni manderangna mande ra·pilskaaniko dakna gita Sukrobar salo, Meghalaya Arm Wrestling Association, dingtangmancha program-ko Shillong songjinmani KJP Assembly Hall-o ong·atangaha.
Ia program-ko ong·atanio, a·dokni Chief Minister Conrad K Sangma, Sports Minister Shakliar Warjri aro dingtang dingtang dilgiparangba bak ra·angtokaha.
Ia tom·anio a·dokni Chief Minister Conrad K Sangma, a·gilsak gimikni jakpong pe·susaanio medal-rangko chebaahani gimin susana re·anggipa manderangko mittelpilangengon, World Arm Wrestling Championship ba a·gilsak gimikni jakpong pe·susaanio medal-rangko cheaniara altua ong·ja aro ia pilakan uamangni gisiko nangani aro Isolni ka·sae pattiani a·selsa ong·aha ine parakataha.
Meghalaya a·doko kal·susaanirangko nambatatna gita a·dok sorkari dingtang dingtang kamrangko a·bachengataha ine janapangskaengon, batanggimin bilsirango sorkari, kal·susaanirango bang·en tangka paisarangko koros ka·aha aro iandake tangka paisarangko koros ka·anichi dingtang dingtang kal·susaanirangko namrorobaaniko nikna man·engaha ine Chief Minister parakataha.
Re·baenggipa bilsio a·dok sorkari, Inter-Constituency Football Tournament ba robol kal·susaaniko ong·atna miksongenga ine parakatengon, ia kal·susaaniko Meghalaya Games-ni ja·man ong·atgen aro ia kal·susaanio Assembly constituency damprakonin dolprak robol kal·gipa dolrang bak ra·anggen ine Chief Minister parakataha.
Meghalaya Games-ko ong·atanio kal·chakram biaprango namdapatani aro dingtang dingtang kal·susaanirangko tang·doatna tangka paisarangko koros ka·anichi da·o Meghalaya a·dokba pilak kal·susaanirangon tang·dobapana man·engaha ineba ua aganaha.
World Arm Wrestling Championship-o bak ra·egiparangna Chief Minister’s Development Fund-oniko adita tangka paisarangko dakchake on·atna man·aha ineba Chief Minister, an·tangni kusi ong·aniko parakataha.
Ia World Arm Wrestling Championship-o medal-rangko chebagipa manderangara, Senebi Syngkli, Mihsngewbha Rymbai, Starina Jasaiñ, Hubert Paliar, Margaret Pathaw, Donbor Rumnong aro Johnny Nongrum ong·achim.