NEIGRIHMS-ni nanganirangko ma·mong sorkari baksa agangrikna Tura MP ku·rachaka

SHILLONG: Meghalaya a·dokni skotong Shillong songjinmao donggipa North Eastern Indira Gandhi Regional Institute of Health & Medical Sciences (NEIGRIHMS)-ko chalaianio chagrongna nangenggipa dingtang dingtang neng·nikanirangko ma·sie ra·na gita Sombar salo, Tura-ni Lok Sabha MP Saleng Sangma, NEIGRIHMS-ona re·angaha aro uko NEIGRIHMS-ni Director Prof Nalin Mehta aro gipin official-rang rimchaksotokaha.
Adita salrangna skangsan Tura-ni Lok Sabha MP Saleng Sangma-ko NEIGRIHMS-ni Governing Council-o membor dake songahachim aro uandaken ua saksa Lok Sabha-ni MP ong·an baksana NEIGRIHMS-niba membor ong·e, institute-o chagrongna nangenggipa neng·nikanirangko ma·sie ra·na re·angaha.
Ia tom·anio NEIGRIHMS-ni Director aro gipin official-rang, NEIGRIHMS-ni obostarangko Sangma-na agan-talate on·angaha aro uaba NEIGRIHMS-ni ning·o donggipa dingtang dingtang department-o kam ka·enggipa official-rang baksa agangrikna somoiko ra·aha.
Ia tom·anio Tura-ni MP Saleng Sangma, NEIGRIHMS-ni official-rang baksa agangrikengon, NEIGRIHMS-o ong·enggipa obostarangko aro dingtang dingtang neng·nikanirangko ma·sie ra·na gitasa re·baaha ine aganaha. Institute-o chagrongna nangenggipa neng·nikanirangko ma·sie ra·genchimosa ua ma·mong sorkari baksa agangrike, NEIGRIHMS-ko namdapatanio dakchakanirangko on·na man·gen ineba Sangma aganaha.
An·tangtangni nanganirangko una kan·dike see on·china gitaba ua NEIGRIHMS-ni dingtang dingtang department-rango kam ka·enggipa official-rangko didiangaha.
Salgro salaram jolo songdongenggipa manderang bang·batan NEIGRIHMS-ko nambatgipa hospital aro skie on·chakgipa institute ine ma·sitokani gimin institute-ni nanganirangko chu·sokate on·na ua ta·raken kamko ka·gen ineba Tura MP ku·rachakaniko on·angaha.
NEIGRIHMS-o sagipa manderangna guest house-ko rikna gita a·arangko on·china mol·molengani gimin ua iani bidingo Meghalaya sorkari baksa agangrikgen ineba Sangma aganaha.