TURA: Rongjeng police station-o kam ka·enggipa me·chik police sub-inspector (SI) saksa, manderangna ka·saninggija dake mesokrongani gimin manderangni gisikrango kenanirangko aro ka·dongna man·gijaniko ong·atenga ine Rongjeng-ni dingtang dingtang NGO-rang parakatenba, ia me·chik police officer-ko dingtang biapona kam ra·jitatchina East Garo Hills a·jani Superintendent of Police (SP)-ko didiataha.
NGO-rangni SP-na sedoatgipa chittio parakani gitade, ia me·chik police officer, an·tangtangni kam nangana re·anggipa manderangko ka·saninggija dake mesokronga aro manderangko raka kattarangchi aganrongani gimin manderangni gisikrango kenanirangko aro police-rango ka·dongna man·gijaniko ong·atengachim.
“Ia me·chik police officer-ni dakbewalrangara, police officer-na kragijaniko mesokenga aro uni manderangko ka·ting dake mesokanian manderangni gisikrango police-rango ka·dongna man·gijaniko ong·atenga. Uni gimin jolo songdongenggipa manderangni namgnina ia me·chik police officer-ko dingtang biapona apjitatchina chinga mol·molenga,” ine NGO-rang, East Garo Hills a·jani SP-na sedoatgipa chittio janapataha.