TURA: A·doko sorkariko rikahani gimin District Council election-oba National People’s Party (NPP)-ko seokgenchimode tangka paisarangko aro dingtang dingtang scheme-rangko man·bae on·an baksana Garo Hills Autonomous District Council (GHADC)-o kam ka·enggiparangnaba jaantian dormaharangko on·gen ine NPP-ni dilgiparang ku·rachakahani giminsa 2020 bilsini GHADC election-o Garo Hills-ni manderang NPP-ko seokahachim indiba NPP-ni Executive Committee-ko rikchengaoni da·alona maming dingtanganiko ra·bana man·jaha ine Gambegre by-election-o Trinamool Congress (TMC)-ni candidate ong·e susaenggipa Sadhiarani M Sangma matnangataha.
An·tangtangni biaprango ong·enggipa obostarangko nienba, name chanchichengesa ia Gambegre by-election-o dilgipako seokchina gitaba ua constituency-ni manderangko didiataha.
“A·dok sorkari ba district council-ko niatgenchimoba an·ching pilakni gitan namroro silroroani pal namjabatroroanikosa nikna man·enga. MDC election-ni somoio uamang (NPP), a·doko sorkariko rikahani gimin district council-oba tangka paisarangko aro scheme-rangko man·bae on·an baksana jaantian kam ka·giparangna dormaharangko on·na man·gen ine ku·rachakenba, NPP-ni candidate-rangko seokchina manderangko aganaha. Manderang uamango ka·donge uamangni candidate-rangko seokaha aro uamang EC-ko rikna man·aha. Indiba da·alo mai ong·enga? GHADC-o kam ka·enggiparang ja 35 batpile dormaharangko man·tokkujaenga, Garo Hills-ni namroro silroroanina ma·mong sorkarini chamatgipa tangka paisarangko uamang jakkalsretenga. Uni giminsa Gambegre constituency-o songdongenggipa manderangko anga mol·molenga. Ia changode uamangni tol·pinapanirango bebera·jachina aro an·tangtangan chanchie namgipa dilgipakosa seokchina,” ine Sangma aganaha.
“Na·simang sakantini jakrangon mobile phone-rang donga. Kakketko Google ka·e sandibo aro an·tangtangna ma·sie ra·bo. Na·simang an·tangtangan dilgipako name basee seokbo,” ineba ua aganaha.
Gambegre constituency-o namroro silroroani donggijako ua an·tangan nikmanaha ine janapatskaengon, iani giminsa ia constituency-o namroro silroroaniko ra·bana miksonge ia by-election-o susaenga ine TMC-ni candidate parakataha.
“Ia by-election-o angbaksa susaenggipa gipin candidate-rang, jechi re·angoba bon·changgija ku·mikchetanirangko dakenga. Indiba iandake ku·mikchetaiana an·tangtangni vote-rangko on·nabe. Nang·ni wilwilao mai ong·enga ukosa nienba badia dilgipa baksa na·simang an·tangtangni neng·nikanirangko agane on·na man·gen, uandakgipa dilgipakosa seokbo,” ine Sadhiarani aganaha.
GHADC-ko namdapatna man·gen inesa manderang NPP-na pu·onnachim: Sadhiarani
Date:
Share post:
