TURA: Chang 48-gipa 100 Drums Wangala maniani gnigipa sal, chong·motan Sukrobar salo, Rugala aro jatni ring·susaanirangko ong·atangaha.
Ia gnigipa salo, Meghalaya High Court-ni Registrar General E Kharumnuid, mongsonggipa sokgipa ong·e bak ra·angaha aro ia tom·anio ua jinmana aganprakengon, A·chik jat gimiknan Wangala maniani namgipa skaniko on·angenba, ia Wangala manianio bak ra·pana man·ahani gimin Wangala Committee-ko mittelpilangaha. Ian pattigipa ra·rongipana mittelpile maniani salsa ong·a ine janapatengon, pattianirangna pilakan pattigipa ra·rongipako mittelna nanga aro ia manianichi tom·tomani, ku·mong nangrimani aro namroro silroroaniko Meghalaya a·dok gimiknan ra·bana man·gen ine Kharumnuid aganaha.
Ia maniani gnigipa salo, dingtangmancha songni kamalrang, Rugala manianiko dakdilangaha aro iano dingtang dingtang dilgiparang aro Wangala manianiona re·bagipa pilakan bak ra·angtokaha.
Ia Wangala maniani gnigipa salo, A·chikrangni dingtang dingtang ring·anirang jekai, Harara, Nanggorere, Serejing Wal·jan, Sonatchi Boiar, Gogaiwai Gosaiwai, Ang’ Atchiram A·songtang Garo Hills, Chanchiate Aman A·songko, An·sengriri Aiao Angade, Akai Dira, Mewek Mewek Mikoa, Hai Anga Dania aro uandakgipa ring·susaanirangkoba ong·atangaha.