Sorkari, NEHU-ni VC-ko ong·enggipa obostarangni bidingo agangrikna okamgen

Shillong: A·dok Sorkari da·o ong·enggipa obostarangni bidingo NEHU-ni Vice Chancellor Prof Prabha Shankar Shukla-ko sing·sandianirangko dakna ine okamna chanchienga.
NEHUSU aro KSU NEHU uamang Bristibar salo university-ni napchakgipa gate-ko chipe donaha aro Vice Chancellor, Registar Colonel (retd) Omkar Singh aro Deputy Registar Amit Gupta mangni bimangko tarienba so·e galaha.
Education Minister Rakkam Sangma Sukrobar salo koborna paraka je, A·dok Sorkari ia da·o ong·enggipa golmalrangni bidingo suk ong·chakja aro mikkang antioni under-graduate chatro chatrirangni porikkarang a·bachengna gita am·engaha iani bidingoba namen chanchianirangko dakna nangenga.
Sorkari, university-ko chalaina gitaba bang·gija dakchakanirangko on·a gitasan man·aia indiba chinga man·a dipet ia da·o ong·enggipa golmalko namatna jotton ka·gen, ua aganaha.
‘‘Chinga NEHU-ni VC aro uko dilgiparang baksa tom·anirangko dakgen aro uamangkosan ong·aigija iako dilenggipa chatro chatrirangkoba gronganiko dakjolanggen aro ia golmalrangko nama chanchiaona ra·bana jotton ka·anggen,’’ ine Sangma aganaha.
Ua iani bidingo Ministry of Education baksa golpogrikanirangko dakanggen ine agandapan baksa, “golmal ong·anirangko dal·atjachina” gitaba chatro-chatri-rangko mol·mole aganaha.
Jegalenggipa ge·gni chatro chatrirangni dolrang VC-ni ia da·o ong·enggipa jegalaniko dontongchina mol·molgipako aro Registrar aro Deputy registrar-ko ra·galani bidingo am·sandianiko dakchina committee-ko songchina agangipakoba uamang ra·chakjaha.
Uandake Congress party ia NEHU-o ong·enggipa golmaloni chel·e dongna uamang baseaha maina iani bidingo Political Partyrang jakko on·genchimode university-kon dakgrikchakgipa biap ong·atnaba donga ineba ua aganaha.
“An·ching iani bidingo maming dakeba jakdangdikpana nangja, maina da·o gita Congress, BJP aro uandake gipin party-rang jak on·ode Politician-rangni dakgrikchakgipa biapsa ong·ainok aro ian NEHU-ni chatro chatrirangna namgipa ong·jawa” ine Congress-ni Chief Vincent H Pala parakaha.
Iani bidingo jak on·pana ine ango mol·molanirangko anga man·soaha ine Pala aganaha, “Anga university-ona politics-ko ra·napangna sikja, maina uano National Student-rangni Union-ba donga, uamang nangnikode iani bidingo ja·ku de·anirangko dakanggen” ine agandapaha.
Pala indake agandapaha je, anga Shillong-ni MP ong·mitting somoio NEHU-ni organisation-ni membor-rang re·baachim indiba anga uani bidingo mamingkoba aganchakjaha maina anga Politician-rangko da·ororo ong·enggipa obostarangna aro university-ko chalaiani bidingo bak dongatna sikja ine ua aganaha.
“Anga NEHU-ni bidingo Parliament-o aganchimode ian uko chalaienggiparangna kratcha·ani ong·gen aro uasan ong·aigija university-naba dal·a kratcha·aniko ra·baa. Uni gimin anga an·tangde maming saloba NEHU-ni bidingo manderangni mikkango parake agananirangko dakja, uamang angko gronganirangko dakomangba anga minister-rangna chittirangko seatanirangko dakronga aro grongronga” ine Pala parakaha.
Sonibarlko man·chape chatro-chatrirangni okumu chake jingjengatani ian bongagipa sal ong·engaha.