SHILLONG: Re·anggipa Robibar pringwalo, North Eastern Hill University (NEHU)-ni Vice Chancellor Prof Prabha Shankar Shukla-ni official quarter-ko chadrape nosto ka·aniara chatro chatrirangko biming man·atna dakmikanisa ong·akon ine NEHU Teachers Association (NEHUTA), an·tangtangni chanchichipenganiko parakataha.
Chatro chatrirangni jingjengate university gimikko chipe donaton maikai VC, university-oni ong·katangna man·aha ine sing·doatengon, an·tangni official quarter-ko chadrape nosto ka·anio VC an·tangan jak dongakon ine NEHUTA-ni president Lakhon Kma, an·tangni chanchichipenganiko parakataha.
“VC-ko university-oni ong·katangna dakchakgipa manderangan ia kamo jak dongna nanga. Ia a·selo sawarang jak donga chinga ma·sina nangengani gimin ia a·selni bidingo name sandirokna nangchongmota,” ine Kma aganaha.
VC-ni official quarter-ko nosto ka·anio sawarang jak dongmanchaa, uko ma·sina gita ia a·selni bidingo sandirokatchina gitaba ua a·dok sorkariko didiataha.
Ian chatro chatrirangni okumu chake jingjengataniko bilgriatna gita dakmikanisa ong·akon ineba NEHU-ni president aganaha.
Ia a·sel ong·anio chatro chatrirangde jak dongja ine talataniko on·angengon, chatro chatrirang iandake chadrapna miksonganirang donggenchimode VC-ni office-ona re·bamiting somoion iako dakna man·achim ine Kma aganaha.
Indake ong·engon, NEHU-ni VC, naljokgipa biapon ong·enga ine NEHU administration-oni kobor on·timgiparang u·iataha.
Kobor on·timgiparangni u·iatani gitade, NEHU-ni VC, an·tangni ma·chakenggipa biapko darangnaba parakkujaenga.