TURA: Gambegre by-election-na pu·onani Budbar salo matchotangaha aro ia by-election-o pu·onani 90.84 percent ong·aha.
Gambegre constituency-ni gitcham MLA Saleng A Sangma, ia bilsini a·bachengachibara ong·atanggipa Tura parliamentary election-o chegipa ong·e MLA ong·aniko watna nangahani gimin ia by-election-ko ong·atna nangahachim aro uandaken ia by-election-o National People’s Party (NPP), Meghalaya a·dokni Chief Minister Conrad K Sangma-ni jikgipa Mehtab Chandee A Sangma-ko susaatengon, Trinamool Congress (TMC)-ba a·dokni gitcham Minister Zenith Sangma-ni jikgipa aro Dengnakpara-ni MDC Sadhiarani M Sangma-ko susaatskaahachim. Una agreba ia by-election-o Indian National Congress (INC)-ni candidate Jingjang M Marak, Bharatiya Janata Party (BJP)-ni candidate aro Tura-ni MDC Bernard N Marak baksana Independent candidate sakgni, chong·motan Sengkrabirth Ch Marak aro Jerry A Sangma-ba susaangaha.
Gambegre by-election-ni vote-rangko re·baenggipa November 23 tariko channa siengon, sawa ia by-election-o chegipa ong·gen, ian manderangni gisepo sing·anirang ong·katenga.
Candidate-rangko sulsul nianggenchimode, ia by-election-o NPP-ni candidate Mehtab Chandee A Sangma-na cholrang nambatenga maina ia by-election-o uni segipa aro a·dokni Chief Minister Conrad Sangma an·tangan, a·dok gimikni dilgiparang baksa bilakbee campaign-ko ka·dilaha.
Batanggimin chang election-rango NPP, Gambegre constituency-o chu·sokgipa ong·na man·kujaengoba ia changode NPP-na dingtangani cholrangba donga.
TMC-ni candidate Sadhiarani Sangma-ni gimin niatskagenchimode, batanggimin chang Assembly election-o ua gnigipa biapko man·rikahani gimin aro da·oba Dengnakpara constituency-ni MDC ong·kuengani gimin ua an·tangba ia by-election-ko chena ka·dongenga aro haida cholrang una dongbebenaba gnang. Ia by-election-o TMC-ni candidate-na a·dokni gitcham Chief Minister Mukul Sangma, uni jonggipa aro candidate Sadhiarani-ni segipa Zenith Sangma baksana dingtang dingtang dilgiparangba bilakbee campaign ka·angahani gimin bang·a manderangan unaba chol donga ine agantokskaenga.
INC-ni candidate Jingjang M Marak-ni gimin niatskagenchimode, batanggimin bilsi 15-na Congress MP Saleng Sangma-an ia constituency-ko rim·kepna man·aha aro ua an·tangan ia by-election-oba Congress candidate-na bilakbee campaign ka·dilahani gimin ia by-election-ko Congress dolan cheangpilani cholba dongaia. Congress candidate Jingjang Marak-ko constituency-ni mitam manderang ma·sijagenchimoba, ia constituency-ara Saleng-ni gitcham constituency-an ong·ani gimin Saleng-ni bimingchin ia by-election-ko chena man·ani cholrang dongaia.
BJP-ni candidate Bernard N Marak-ni gimin niatskagenchimode, ua a·bachengonin ma·mong sorkarini ra·gate on·gipa scheme-rangni bidingo ku·rangko on·enggipa aro a·dok sorkarini pilak ong·gija dakanirangko manderangna parake on·enggipa ong·ani gimin Garo Hills-o BJP-ni niksengbatsranggipa dilgipa ong·e, songadam nokadamrango manderangni chakpaanirangko man·gipa ong·skaenga. Ia by-election-o ua (Bernard), BJP-na kam ka·enggipa manderang baksa rakbee kamrangko ka·soahani gimin result-ni salo haida manderangni chanchisogijagipa result-rangko ong·atna man·ani cholrangba dongaia.
Ia by-election-o susaenggipa Independent candidate sakgni, chong·motan Sengkrabirth Marak aro Jerry A Sangma-ba rakbee kamrangko ka·sotokaha aro ia by-election-o uamang chegen ine darangba chanchisotokjaengoba, uamang badita vote-rangko man·gen aro ia vote-rangchi mai dingtanganiko ra·bana man·gen, uani bidingo dingtang dingtang political dolrang jajrengsotokskaenga.