SHILLONG: North Eastern Hill University (NEHU) gita dakgipa ma·mongni institute-rango RSS aro BJP-o bak ong·gipa manderangko kamo seoke ia institute-rangko RSS aro BJP dolrang jakkepna jotton ka·enga ine matnanganiko Bristibar salo BJP jegalataha.
RSS aro BJP dolrang, an·tangtangni manderangko North Eastern Hill University (NEHU)-ko chalaina jotton ka·ahani a·selsa so·sojengjeng ong·anirang a·bachengaha ine adita salrangna skangsan a·dokni Congress dol matnangatahachim.
Ma·mongo BJP sorkariko rikani ja·man, RSS aro BJP baksa bak ong·gipa manderangko chalaina gita NEHU-ni official dake songahani a·selsa NEHU-o so·sojengjeng ong·na a·bachengaha ine Congress dolni dilgipa Ronnie V Lyngdoh aganahachim.
Iani bidingo am·sandienggipa dolba, RSS aro BJP-o bak ong·gipa manderang, jemangan nanga gita poraiani gadangrang dongjachim, uandakgipa manderangkosa university-ni official-rangna seokaha ine ma·sina man·aha.
Indake ong·engon, iandake matnanganirangko, Meghalaya BJP-ni ku·wattimgipa M Kharkrang jegalatskaenba, NEHU-ko chalaianio RSS aro BJP dolrang jak on·paani dongama dongja, uko name sandichengna nanga ine parakataha.
NEHU-o ong·enggipa golmalrangni bidingo ma·mongni BJP dolba jako ra·manaha ine janapatskaengon, NEHU-o ong·enggipa obostarangni bidingo ma·mongni party dilgiparang baksa agangrikna bakan a·dokni BJP dilgiparang, New Delhi-ona re·angnaba gnang ine Kharkrang parakataha.
BJP-ni kosako iandake matnanganirangko dal·e ra·jachina didiatengon, ma·mong sorkarini gita je kamna seokgenchimoba pangnan kamni gimin u·i-ma·sigipa manderangkosa nienga ine Kharkrang parakataha.
Indake ong·genchimoba, iandake matnanganirangara kakket ong·genchimode NEHU-ni mikkim rasongko ra·bapilna gita ma·mong sorkari nanga gita ja·kurangko de·angaigen ine BJP-ni ku·wattimgipa ku·rachakaniko on·angaha.