WILLIAMNAGAR: Skill Development-ni ningo skie ra·e matchotgiminrangna mande ra·pilskaaniko dakna gita Sukrobar salo, Williamnagar-ni DRDA Hall-o program-ko ong·atangaha. Indake ia program-ona a·dokni PHE Minister Marcuise N Marak mongsonggipa ong·e sokbaaha aro ia program-o sak 200 skie ra·giparang bak ra·angaha.
Ia tom·anio a·dokni PHE Minister Marcuise Marak, jinmana aganprakengon, “Skill Development training-o skie ra·ani ja·man, chona bading chiwalanirangko chakchike aro jotton ka·e kamrangko ka·anichisa bading chiwalanio chu·sokgipa ong·na man·gen,” training-o skie ra·gimin manderangna agan-ku·pattie on·angaha. Ja·mano Marak-ni jakchi, ia Skill Development training program-ko matchotgimin manderangna certificate-rangkoba suale on·angjolaha.
Ia program-ko ong·atanio East Garo Hills a·jani Deputy Commissioner Vibhor Aggarwal aro gipinrangba dongpae bak ra·angtokaha.
