SHILLONG: Shillong Western Bypass ramako tarienggipa National Highway & Infrastructure Development Corporation Limited (NHIDCL)-ni manderangko chadrape, ia rama tarianio jakkalenggipa bosturangko ro·ongrangchi goe nosto ka·ani ja·man, ia project-ni package-II-o kamrangko dontongatchengna nangaha.
NHIDCL official saksani u·iatani gitade, uamangna dakchakanirangko aro chel·chakaniko on·china Ri Bhoi district administration-o bi·atahachim indiba dos dakgipa manderangni kosako maming ja·kurangko de·kuja aro uamangna maming chel·chakanirangko on·kujaengachim.
Ia project-ko ta·rake matchotatna gita chel·chakanirangko on·china mol·molahaoba Ri Bhoi district administration maming ja·kurangko de·jaengani a·sel ia Western Bypass ramako tarianio uamang neng·nikanirangko chagrongna nangenga ineba NHIDCL official parakataha.
NHIDC official-ni aganani gitade, Umraleng songo km 13.465-oni km 15.650-ona a·arangko Ri Bhoi district administration, ia bilsini June 18 tarikon NHIDCL-na pakwate on·manahaoba ia bakrango ka·enggipa kamrangko mitam manderang champengataha.
Ia manderang, mahari dilgipaoniko an·tangtangni man·na nangenggipa a·ani tangka paisarangko man·kujaengani gimin kamrangko ka·na on·jaha ineba NHIDCL official parakataha.
“Ia kamko ka·ani mongsonggipa somoi ong·engachim indiba iandakgipa obostarangchi chinga somoirangko gimaatna nangengaha,” ine official aganaha.
