SHILLONG: Re·baenggipa February 21 tariko ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-na gazette notification ba u·iataniko re·baenggipa January 27 tariko on·anggen.
Sorkari official saksani kobor ra·timgiparangna parakatani gitade, dingtang dingtang constituency-rango an·tangtangni dilgiparangko seokna gita sorkari, January 27 tariko jinmana u·iataniko on·anggen.
Ia district council election-na nomination file ka·aniko January 27 tarikonin a·bachenggnoik aro February-ni 4 tarik attam 3:00 bajiona ra·chakanggen. Uni ja·man joljol apsan salon, nomination-rangko scrutiny ka·anggen ba nipilangskagen ine official parakataha.
Nomination paper-rangko ra·pilani bon·kamgipa tarikara February-ni 5 tarik ong·gen.
Draft electoral roll-rangko Sombar salo chapa ka·e, bon·kamgipa electoral roll-rangko January 27 tariko chapa ka·angskagen ineba sorkari official aganaha.
KHADC aro JHADC election-na pu·onaniko February 21 tariko ong·atenba, vote-rangko February 24 tariko chanskagen.