TURA: Sombar salo, National Youth Climate Consortium (NYCC) Garo Hills unit, dingtangmancha jinma rongtalataniko West Garo Hills a·jani New Bhaitbari Bazar-o ong·atangaha aro ia rongtalatanio, New Bhaitbari Bengali Youth Federation, New Bhaitbari Bazaar Committee, aro All Meghalaya Minorities Labour Union baksana jolo songdongenggipa manderangba bak ra·angtokaha.
Jinma rongtalatani ja·man dingtangmancha awareness program-koba ong·atangaha, jeon rongtal an·talaniko rakkina nangani gimin songni nokni manderangna agan-talatanirangko on·angaha.
Batanggimin somoirangoba ia project-ni ning·o NYCC-ni membor-rang, jolo songdongenggipa chadamberang aro skulrango poraienggipa chatro chatrirang baksa awareness program-rangko ong·atangaha aro ia awareness program-rangkoba ong·atanioba chadamberangna, samtangtangko rongtal an·tale rakkina nangani gimin aro samtangtango ong·telaigiparangko ripinge rakkina nangani gimin talatanirangko on·angaha.
Ia rongtalatani program-o bak ra·giparangna mittelpilani chin gita Gamocha aro certificate-rangko on·angaha.
Ia program-ko ong·atanio NYCC-ni dilgipa Rakesh Ch Saha, jinmana aganprakengon, jinma bakrime kamko ka·genchimode samtangtangko rongtal an·tale rakkina man·a ine didiani kattarangko aganangaha.
Samtangtangko rongtal an·tale rakkiaiasan ong·aigija samtangtango donggipa buring bolgrim, chiring chisik aro pilak ong·telaigiparangko ripinge rakkichina gitaba ua didiangaha.