SHILLONG: Meghalaya Cabinet-ni ra·chakgimin mingdok amendment Bill-rangko chanchirimna gita February 28 tarikoni a·bachengatenggipa Assembly-ni Budget Session-ona ra·angenga ine a·dokni Chief Minister Conrad K Sangma parakataha.
Chief Minister-ni parakatani gitade, ia Bill-rangara, Meghalaya State Investment Promotion & Facilitation Bill 2025, Meghalaya Fiscal Responsibility & Budget Management Act, Meghalaya Goods & Services Tax Amendment Bill 2025, Water Prevention & Control of Pollution Amendment Act, Meghalaya Police Act aro Meghalaya Registration of Birth & Death Amendment Rules ong·a.
Meghalaya State Investment Promotion & Facilitation Bill 2025-ko Budbar salo sorkari taridape ra·chakangaha aro Bill-ko Assembly-ni Budget Session-o parakatgen ine Chief Minister parakataha.
Meghalaya Fiscal Responsibility & Budget Management Act-ko taridapani bidingo talataniko on·angskaengon, 15th finance commission-ni somoio deficit-ko 3.5 percent-ona ra·bana on·aha aro ian India sorkari aro Reserve Bank-ni niamo gita ong·engani gimin a·songni pilak biaprangon ja·rikenga ine Chief Minister parakataha.
Meghalaya Goods & Services Tax Amendment Bill 2025-ni bidingo janapatskaengon, ia Bill-ko GST Council-ni tik ka·gimino pangchake Cabinet ra·chakangaha aro Water Prevention & Control of Pollution Amendment Act-koba Central Act-o pangchake taridapaha ine Chief Minister parakataha.
Meghalaya Police Act 2010-ko taridapna tik ka·ani bidingo janapatskaengon, Supreme Court-ni rai on·anio pangchake ia niamko Cabinet taridapaha ine Sangma aganaha.
Chief Minister-ni parakatani gitade, Meghalaya Registration of Birth & Death Amendment Rules-koba Cabinet, ma·mong sorkarini dongimin niamrango pangchake ra·chakangaha.