A·DOKGRE: North Garo Hills a·jani A·dokgre jolrango bijoli jakkalenggipa nokdangrangna nangana bate bijolni bill-rangko sokatenga aro mitam nokdangrangonikode bijoliko ra·galenga ine matnangenba A·chik Holistic Awakening Movement (AHAM) A·dokgre regional unit, a·dokni Power Minister AT Mondal-na badi ka·doangaha.
AHAM-ni Power Minister-na badi ka·doangani gitade, A·dokgre jolrango bijoli jakkalenggipa nokdangrangna bijolini bill-rangko bate on·engani a·sel aro mitam nokdangrangonikode bijoliko rattonge galengani a·sel ia jolrango songdongenggipa manderang neng·nikanirangko chagrongna nangtokengachim.
“Bulb rong 2 rong 3 jakkalenggipa nokdangrangnan gong 600 gong 700 ka·erang bijolini bill-ko on·engani a·sel ia nokdangrang neng·nikanirangko chagrongna nangtokenga. Ia nokdangrangni neng·nikanirangko namatani pal batesa power department, maming u·iatchengani gri mitam nokdangrangonikode bijoliko rattonge galenga,” ine AHAM, Power Minister-na badi ka·doangaha.
A·dokgre jolrango songdongenggipa manderang namgniko man·na gitasa dilgipako seokahachim indiba da·alo neng·nikanirangkosa chagrongna nangtokskaenga ineba AHAM matnangataha.
“Ia gital chasongo lekka porana bijoliko nangtelgipa ong·aha indiba mitam nokdangrangoniko bijoli rattonge galani a·sel Board porikkana poraienggipa chatro chatrirang neng·nikanirangko chagrongna nangtokengaha,” ine AHAM A·dokgre regional unit-ni dilgiparang parakataha.
Ia nokdangrangna bijoliko on·pilchina sorkariko didiatengon, bijoli jakkalenggipa nokdangrangna bill tarianikosa name nipilna nangchongmotenga ine AHAM janapataha.