TURA: South Garo Hills a·jani Siju jolrango donggipa Simsang chibimao na·tok sie balboe dongako nikani ja·man Garo Students Union (GSU) Siju regional unit, March-ni 13 tariko police-rangna badi ka·doangaha.
Police-rangna FIR-ko GSU Siju regional unit-ni general secretary Welbing Sangma, Siju police station-o ka·aha aro uni FIR-o parakani gitade, ia Simsang chibimao samrangko satahani a·sel na·tok-na·batrang siengachim.
“Simsang chibimao samrangko satani a·selsa na·tok-na·batrang sienga ine chinga nikna man·enga. Iandake chibimarango samrangko sataniara na·tok na·batrangnasan ong·aigija manderangnaba kenchakna nangani ong·enga,” ine GSU Siju regional unit-ni general secretary, Police-rangna ka·doanggipa FIR-o parakataha.
Simsang chibimao ong·gija dakgipa jabolrangko galani a·selba na·tokrang siengnaba gnang ine janapatskaengon, iandake Simsang chibimako moila ong·atanichi na·tok na·batrang sina nangengani gimin iani bidingo ning·tue sandirokenba, dos donggipa manderangni kosako rakgipa ja·kurangko de·china GSU Siju unit didiataha.
Mikkangchi Simsang chibimao, chini jonturangnasan ong·aigija manderangnaba maming kenchakna nanganirang dongjana gita mikrake nirok sandianirangko dakchina gitaba GSU Siju regional unit, police-rangko didiataha.