TURA: Mikka kimpretani aro goera goani somoirango naljoke dongna man·na gita dakna nanggni aro nanggijanirangko West Garo Hills a·jani Deputy Commissioner aro District Disaster Management Authority (DDMA)-ni Chairman, jinmana u·iataha.
Bilsiantian mikka kimpretani aro goera goanirangchi manderang so·otako aro saknaanirangko man·na nangrongengani gimin noktangtango lightning conductor-rangko donna gita electrician-rangoniko agan-ku·pattianirangko ra·china DC u·iataha.
Mikke kimpretani somoirango mande a·palo ong·genchimode pangnan nokking rakgipa garirango ba rakgipa nokrango katnapchina indiba bangbang dake rikgipa nokrango, ba·rani tent-rango, bol kokkimarango aro silni krongrango mikka chakjachina gita DC u·iataha. Mikka kimpretengmiting somoirango nape katna maming biaprang dongjagenchimode ja·arangko apsan chape bamgopchina indiba a·ako tugrangjachina DC mikrakataniko on·angaha.
Mikka kimpretani somoirango cycle ba bangbang dakgipa garirango songrejachina aro ua somoio chio bar ingo ong·genchimode ta·raken chioni ong·kate katchina gitaba DC u·iataha.
Mikka kimpretani somoirango mande nokningo ong·genchimode, a·palrango kadegipa antenna-ni cable-rangko, radio, television, computer modem aro uandakgipa bosturangni power line-rangko okchina aro indakmiting somoirangode bijolini ostrorangko jakkaljachina DC u·iataha.
Mikka kimpretani somoirango goera nanga man·e saknaako man·genchimode, ta·raken ka·tongko nol·china aro medical-ni manderang sokbakujaskal, ku·sikchi rang·sitate donna jotton ka·china DC u·iataniko on·angaha.