SHILLONG: Tura-ko Winter Capital songchina gita Garo Hills-ni dingtang dingtang dolrang dabiengani gimin ia dabianiko sorkari chu·sokate on·genchimode Jowai-koba Summer Capital songskana nanga ine Jaintia Students Union (JSU) dabiangaha.
JSU-ni general secretary Neilkee Mukhim-ni parakatani gitade, Meghalaya a·doko mongsonggipa jatrang, chong·motan Khasi, Garo aro Jaintia-rang donga aro a·dokni pilak biaprangon apsan dake namroro silroroaniko on·na gita ia jatgittamnan apsan dake cholrangko on·na nanga.
Ru·uta bilsirangonin Jaintia Hills a·jarango pilakni gitan namroro silroroanirang dongkujaenga ine janapatengon, Jowai-ko Summer Capital songgenchimode ian Jaintia Hills-oba namroro silroroaniko ra·bana aro pilak jatrangna apsan cholrangko on·ani gita ong·gen ine JSU parakataha.
Badiaba biaprangkosan mikkang nitee kamrangko ka·genchimode Jaintia Hills-ni manderang, chu·ongnikgijaniko man·gen ine JSU mikrakataniko on·angaha.
“Badiaba jolrangnasan mikkang niteani donggenchimode JSU, Jaintia Hills jolrango songdongenggipa manderang baksa, an·tangtangni bak rengsiko man·pana gita jingjengatanirangko dakna draatako man·gen,” ine JSU parakataha.
Tura-ko Winter Capital songchina dabienggipani bidingo chanchirimna gita Meghalaya sorkari, pilak party-rangni committee-ko songahachim ine nikna man·a.
Ia committee-ko pilak political party-rangkon, membor sakgniko bak ong·atchina gitaba sorkari u·iataha.
Ia committee-ni chanchirimanio bak ra·na gita dingtang dingtang sorkari department-rangkoba okamna sienga.
Ia committee-ni mongsonggipa kamara, Tura-ko Winter Capital songanio namgni aro namgijanirangko nianian ong·gen.
Iani bidingo ia committee, a·doko songdongenggipa aro dingtang dingtang dolrangni chanchianirangkoba ra·e ja·mano a·dok sorkarina report-ko on·pilgen.