TURA: North Garo Hills a·jani Adokgre songo, higher secondary gadango lekka porako on·enggipa skul RMSA-mangmangsan dongaiani a·sel bang·a chatro chatrirangna biaprang tikjaengani gimin neng·nikanirangko chagrongna nangenggipa chatro chatrirangni namgnina ia skulo morning shift-ko kulie on·china Kharkutta-ni MDC Cherak W Momin, a·dokni Chief Minister Conrad K Sangma-na sedoataha.
Ia bilsini SSLC porikkao 80 percent-na batpilen chatro chatrirang pass ka·ahani a·sel bang·a biaprangon, chatro chatrirangna admission-ko on·na man·jaengani gimin morning aro evening shift-rangko kulidape, chatro chatrirangna admission-ko on·na jotton ka·engachim ine nikna man·a.
Indake ong·engon, North Garo Hills a·jani Adokgre songoba RMSA-na agre higher secondary skulrang dongjani a·sel, ia bilsio SSLC-ko pass ka·gipa bang·a chatro chatrirangan biaprangko man·jae neng·nikanirangko chagrongna nangtokenga.
Iani bidingo Kharkutta-ni MDC Cherak Momin, Bristibar salo, a·dokni Chief Minister-na, North Garo Hills a·jani Deputy Commissioner-o memorandum-ko on·atenba, Adokgre songo admission man·jae neng·nikanirangko chagrongna nangenggipa chatro chatrirangna cholrangko on·china didiataha.
“Adokgre songo higher secondary skul damsasan dongaiani a·sel bang·a chatro chatrirangan admission-ko man·jae neng·nikanirangko chagrongna nangtokenga. Ia chatro chatrirang, Kharkutta, Mendipathar aro uandakgipa biaprangona re·rurae porainaba cholrang dongpaja, uni gimin ia chatro chatrirangna biaprangko tikatna man·na gita ia skulo morning shift-ko kulie on·china anga mol·molenga,” ine Momin, Chief Minister-na seatgipa chittio janapataha.
Iana skang, Adokgre jolni dingtang dingtang dolrangba, a·dokni Chief Minister-ko gronge, chatro chatrirangni namgnina ia skulo morning shift-ko kulie on·china mol·moltokaha aro Chief Minister-ba iani bidingo niatna gita ku·rachakaniko on·angaha.