SHILLONG: Meghalaya a·dokni Sohra jolo Raja Raghuvanshi-ko so·otanina rim·ako man·gipa Sonam Raghuvanshi-ni nokdangko sing·sandina gita Budbar salo Meghalaya a·dokni police-rang, Indore songjinmaona re·angaha.
Kobor on·timgiparangni u·iatani gitade, Meghalaya a·dokni police-rang, Budbar pringo, Indore songjinmani Govind Nagar Karcha jolo donggipa Sonam ma·gipani nokona sokangaha indiba police-rang noko napa bakan, darangba nikna man·jana gita nokni do·gacholko chipe donaiaha.
Sonam-ni nokdangko Meghalaya-oni re·anggipa police-rang, kontagnimangna sing·sandiaha ineba kobor on·timgiparang parakataha.
Police-rang nokoni re·anga bakan Sonam-ni adagipa Govind-ba gario gadoe nokoni ong·katangskaaha ineba kobor on·timgiparang parakataha.
Ja·mano kobor ra·timgipa manderang baksa agangrikengon, Sonam-ni dakbewalrangkosan Meghalaya-ni police-rang, uo aro uni nokdango sing·sandie ra·angaiaha ine Govind aganaha.
Raja Raghuvanshi-ko so·otna skang uni jikgipa Sonam, Sanjay Verma minggipa mande baksa ru·uta somoirangna phone-o golporongachim ine agangipani bidingo sing·on, iani gimin ua an·tangde mamingkoba ma·sija ine Govind aganchakaha.
Raja-ko so·otani bidingo kakketko ma·sina man·na gita Sonam-ni nokdang gimikkon porikka ra·e nina nanga ine Raja Raghuvanshi-ni nokdang dabiengachim.
Iani bidingo aganchakaniko on·angskaengon, ua an·tangde maming dos dongja indiba saoba uni kosako chanchichipanirang dongenga ong·ode ua je dakgipa porikkakoba chagrongna man·aigen ine Govind aganaha.
Iana skang, Mongolbar waloba Meghalaya a·dokni police-rang, Sahakar Nagar-o donggipa Raja Raghuvanshi-ni nokona re·ange, nokni manderangko sing·sandie ra·angaha.
Iani bidingo kobor ra·timgiparangna u·iatengon, “Meghalaya Police-ni membor sakgittam, chingni nokona re·baaha aro ata kontamangna chingko sing·sandiangaha. Uamang Sonam-ni dakbewalrangni giminsan sing·sandiangaiaha. Bia ka·ani ja·man Sonam badita salrangna chingni noko dongaha, ukoba police-rang sing·aha,” ine Raja-ni adatang Vipin Raghuvanshi aganaha.
Bia ka·daldale Sohra-ona re·baani ja·man Raja Raghuvanshi-ko so·otanina uni jikgipa Sonam aro uni mikchagipa Raj Kushwaha baksana uni ripeng sakgittam, chong·motan Vishal Chauhan, Akash Rajput aro Anand Kurmi-ko police-rang rim·ahachim.