Tura: North Tura Constituency-ni ning·o ong·gipa Tura Upper Rongkhon gittim-ni gitalgipa Community Hall-ko, meja Sukrobar salo, Meghalaya Legislative Assembly-ni Speaker aro North Tura MLA, Thomas A. Sangma-ni jakchi nokdonggae on·angaha. Indake ia project-ko Chief Minister’s Special Development Fund (CMSDF) aro Special Urban Works Programme(SUWP)-ni gita on·gimin tangka paisarangchi rike on·angaha.
Ia gitalgipa Community Hall-ko oprake on·angao, National People’s Youth Front (NPYF)-ni National Secretary, Dabo M. Marak, Upper Rongkhon Development Committee-ni President aro Secretary aro una agreba gipin mongsonggipa dilgiparang baksana ua jolo songdongenggipa manderangba ia program-o dongpae bak ra·angaha.
Ian Upper Rongkhon jolo songdongenggipa manderangna mingsa rasongchana kragipa aro songsalo maiaba dingtanganiko ra·bana man·anina namgipa chol ong·a ine janapatengon, ia gital Community Hall-ko a·bachengate on·a man·ahaniara, jolo songdongenggipa manderangni namroro-silroroanina, ku·mong nangrimgrikanina aro songsalni manderangni janggi tangani gadangko namroroatna miksonge sorkarini rake kam ka·enganiko mesokanian ong·a ine Program-o mongsonggipa sokgipa Meghalaya Legilative Assembly-ni Speaker aro North Tura-ni MLA, Thomas A. Sangma jinmana aganprakangaha. Una agreba, ua jolo songdongenggipa manderangni ku·cholsan ong·e kam ka·anirangko bilakbatatna aro namroro silroroanina re·mikkanganio dakchakaniko on·na, ia Community Hall-ko jolni mongsonggipa soka chakgipa biapdake dingtang dingtang nanganirangna jakkalna jekai, jinma tom·anina, jatni manianirangna aro songsalni manderangni an·seng baljokani program-rangko ong·atanirango, songsalni manderangna jakkaltobegipaba ong·gen ineba ua aganangaha.
