SHILLONG: Meghalaya a·doko COVID-19-ni tikarang bon·angengaha aro tikarang antisamangnasan ong·aignok ine Mongolbar salo a·dokni Health & Family Welfare Minister AL Hek parakataha.
“Da·o dipet chingo pong 80,000 tikarangsan dongaiaha. Salprako chinga pong 10,000-mangni gita tikarangko jakkalengani gimin da·o tikarang salchetmangnasan ong·aignok,” ine Hek, kobor ra·timgiparangna parakataha.
A·doko bilsi 45 batgimin manderangko tika su·angkuna gita a·dok sorkari, tikarangko on·dapatchina ma·mong sorkariko didiataha ineba Health Minister parakataha.
Indake ong·engon, bilsi 18 batgimin manderangnaba COVID-ni tikako ia anti dipetan su·naba gnang ine official-rang parakataha.
Health official-ni parakatani gitade, a·dokni bilsi 18 batgimin manderangna pong 42,000 tikarang Budbar ba Bristibar salrangon sokbanaba gnang aro tikarang a·dokona sokbaahaon, bilsi 18 batgimin manderangko tika su·na a·bachenggnok.
COVID-19 man·gipa manderangko sannanio jakkalgipa ‘Remdesivir’ samrangko sorkari chu·onga gitan rakkie donenga ineba official parakataha.