TURA: Meghalaya a·dokoba gnigipa changna COVID-19-ni giproroaniko champengna tarisamsoani pal maini gimin Tura-o COVID hospital rikna manchianiko sorkari ra·galpilaha ine a·dokni Opposition Congress dol sing·doangaha.
Congress dolni MLA aro ku·wattimgipa Zenith Sangma-ni parakatani gitade, Tura-o COVID hospital rikna manchianiko ra·galpilaniara sorkarini tarisamsoanirango chu·sokgijaniko aro COVID-ko warachakanio chanchina changgijaniko mesokani ong·ahachim.
“COVID-ni giproroaniko champengsona gita kamrangko ka·soani pal ia sorkari, rang·gitik lockdown-rangkosa ra·gate manderangna neng·nikaniko ra·baaha. Meghalaya a·doko lockdown-ko ra·gatkujawa aro sabisini giproroaniko champengna badiaba badiaba biaprangosan champengatanirangko dakkuaigen ine May 5 tarik pringosan koborrangko man·soahachim indiba apsan salni 1:00 bajimango a·dok sorkari, salbongana East Khasi Hills a·jao chu·gimik lockdown-ko ra·gatenga ine parakatskaaha. Iani a·sel manderang neng·nikanirangko chagrongna nangaha,” ine Sangma parakataha.
Sangma-ni parakatani gitade, manderangni chanchisojaengmiting somoio rang·gitik sorkari lockdown-ko ra·gatahani a·selan manderang an·tangtangna nanga bosturangko ra·na bazar antirango jinma tom·dakna nangao ga·akahachim.
Tura-o COVID hospital rikna manchianiko sorkarini ra·galpilani gimin janapatengon, COVID giprorona a·bachengani somoion Tura-o COVID hospital-ko rikchina dabianirang dongachim indiba re·anggipa bilsio COVID-ko man·giparang komiangengaha ine nikenba a·dokni chief minister, Tura-o rikna miksonggipa hospital-ko dontongatpilaha ine Congress MLA matnangataha.
“Da·o gnigipa chana COVID ta·rakbee giproroengmiting somoiosa a·dokni chief minister, Tura-o COVID hospital-ko rikna manchitaiengaha. A·gilsak gimikon COVID giprorotaigen ine niksamsoen kamrangko ka·sotokengon, ua maikai iandake hospital rikaniko dontongatpilna nangaha?” ine Sangma sing·doangaha.