TURA: Garo Hills gimikon manderangni namnikgijani aro jegalanirangko man·engani gimin Garo Hills Autonomous District Council (GHADC)-ni gital chief executive membor (CEM) Rakesh Sangma, kamtangko watna tik ka·angaha.
Kobor on·timgiparangni u·iatani gitade, ua re·baenggipa Sombar salo, an·tangni gital Executive Committee (EC) baksa tom·aniko ong·atangenba, CEM-ni kamko watna sienga.
Rakesh Sangma-ko CEM-ni kamoniko ra·galpilchina dabie Garo Hills-ni dingtang dingtang dolrang, February ja a·bachengonin jingjengatanirangko dakengachim aro GHADC office-koba kam ka·na on·jaengachim.
Garo Hills gimikon Rakesh Sangma-ko ra·galpilchina dabie jingjengatanirangko daktokengani gimin maming dal·a a·selrang ong·na skangan, uko kamoniko ra·galchina ba ua an·tangan kamko watchina gita adita salrangna skangsan, Tura-o budepa butchumarangni bikotgipa Tura Garo Senior Citizens Forum (TGSCF)-ba didiatahachim.
Indake ong·engon, Garo Hills-o ong·enga obostarangko nike, Rakesh Sangma an·tangan, gital Executive Committee-ni membor-rang baksa chanchirime, kamtangko watna tik ka·angaha ine kobor on·timgiparang u·iataha.
Gital Executive Committee-ni membor-rang, Sombar salni bakon gital CEM-ko seokangskanaba gnang ineba kobor on·timgiparang parakataha.
Rakesh Sangma, chonaonin A·chik jatni daka rikaniko ja·rikgipa ong·ja aro Hindurangni daka rikaniko ja·rikbagipasa ong·ani gimin GHADC-ko dilna kraja ine dingtang dingtang dolrang, uni CEM ong·aniko jegaltokengachim ine nikna man·a.
