TURA: Meghalaya a·doko National People’s Party (NPP)-chi dilenggipa MDA sorkari, bang·en tangka paisarangko jakkalsretengani gimin aro ma·mong sorkarini ra·gate on·gipa scheme-rangko chu·sokatjaengani gimin gipin political dolrangoni bang·bea manderang Bharatiya Janata Party (BJP)-ona katnaptokaha ine Robibar salo BJP-ni dilgiparang parakataha.
BJP doloni seachi parakatani gitade, a·doko tangka paisarangko jakkalsretengani gimin aro ma·mong sorkarini ra·gate on·gipa scheme-rangko chu·sokate on·jaengani gimin dingtang dingtang political dolna kamko ka·enggipa manderang ka·dongani gri ong·tokenba, da·o Garo Hills-o BJP dolna ka·dongskae BJP dolona katnapskaengaha.
“Garo Hills-ni a·bri jolrango aro a·kawe jolrangoba bang·a manderangan BJP dolo ka·donganirangko man·tokskaengahani gimin Mahendraganj aro gipin jolrango gipin political dolrangna kam ka·enggipa ritchani ritcha manderang, bus garirango Tura-ona re·bae BJP baksa bakrimaniko on·eaha,” ine BJP-ni dilgiparang parakataha.
Gipin political dolrangna kam ka·enggipa manderang, a·dok sorkarini kamo suk ong·niktokjaengani gimin a·songo dal·batsranggipa political dolo bakrimna gita re·batokaha ineba BJP-ni dilgiparang parakataha.
Koborko on·ani gitade, gipin dolrangoni katnapbagipa manderangko rimchaksona tom·aniko ong·atani dongpae bakko ra·anggipa BJP-ni dilgiparanga, BJP-ni state vice president aro Tura-ni MDC Bernard N Marak, district president Daulat Chada Marak, youth president Anish Sangma, South Tura president Rabi T Sangma, Tingku Marak aro gipinrang ong·a.
