TURA: Meghalaya Legislative Assembly-ni da·o ong·enggipa budget session-o a·dokni Job Reservation Policy-ko nipiltaichina aro gital dake taridaptaichina mitam MLA-rang, sorkariko didiahani gimin ia Job Reservation Policy-ko taridapgija a·bachengo gitan donchina New Tura Development Forum (NTDF), Tura Garo Senior Citizens Forum (TGSCF) aro Garo Graduates Union (GGU), a·dok sorkariko didiangskaaha.
Iani bidingo a·dokni Chief Minister Conrad K Sangma-na sedoatengon, ia Job Reservation Policy da·o gitcham ong·aha ine taridapchina agananiara namen kragijani ong·enga aro iako Garo Hills-ni NGO-rang raken jegalenga ine dolgittam NGO-rang parakataha.
“Uni gimin ia Job Reservation Policy-ko taridapna gita da·o ong·enggipa budget session-o chanchirimna ra·angjachina aro ia policy-ni niamrangko ja·rikchina chinga mol·molenga,” ine NTDF-ni general secretary L Ch Momin parakataha.
Ia Job Reservation Policy-ara ru·uta bilsirangna skang tarigipa niamsa ong·e da·oni somoi baksa melijaha ine mitam MLA-rang, ia job reservation policy-ko taridapchina gita Assembly-ni budget session-o didiangahachim ine nikna man·a.