TURA: Meghalaya a·dokko man·aoni da·o bilsi 50 gapahaoba South Garo Hills a·jani Chokpot jolode da·alonan maming namroro silroroanirangko nikna man·kujaenga ine jolo songdongenggipa manderang parakataha.
Da·o dipet Chokpot-o All India Trinamool Congress (AITC)-ni Lazarus Sangma, MLA ong·engachim aro 2018 bilsiona kingkingde ia constituency-o sak 25,000-na baten pu·ongiparang dongachim. Re·baenggipa 2023 bilsini election-ode pu·ongiparang 10 percent-chi bariangnaba dongaha ine kobor on·timgiparang u·iataha.
Chokpot jolo songdongenggipa manderangni parakatani gitade, Tura-oni Chokpot-ona kilometre 52-mangsan dongaiachim indiba Chokpot-ona dakanggipa rama jal·langrang namsrangjani a·sel Tura-oni Chokpot-ona gari gorarango re·na gita konta gittammang nangskaengachim.
Ia ramani skanggipa km 19-de Tura-oni Baromile-ona kingkingan NH-51-ni ning·o ga·aka indiba uni ja·man km 13-de rama namsrangjahani a·sel manderang re·ruraanio neng·nikanirangko man·tokna nangenga. Ia km 13-ni ja·man bangki km 20-kode tarina gita a·bachengahachim indiba ia ramako chu·gimikde matchotsrangkujaenga.
“Ia ramani bakko 2014 bilsion tarinade a·bachengatahachim indiba a·bachengode ia jolrango bobil dake chakatgipa manderang bang·ani gimin darangan kamrangko ka·na kentokachim. Bobil dolrang bon·angani ja·man korosrang gadoangskaaha aro chingo indita tangka paisarang dongskajachim. Indake ong·genchimoba chinga bewal bakrangkode matchotatna man·aha aro da·o adita km-rangsan dongaiaha,” ine ia ramako tarienggipa contractor parakataha.
Kobor on·timgiparangni parakatani gitade, ia ramarangko nala grisa taritokaha aro iani a·selan ramarang nosto ong·pile gipin bakrangmingan apsanpilengahachim.
Indake ong·engon, Chokpot-oni Sibbari-ona dakanggipa ramade iana batesa obosta namjabatsrangani a·sel South Garo Hills a·jani headquarter Baghmara-ona re·rurana nangrongenggipa manderangde neng·nikanirangko man·batsrangna nangenga ine jolo songdongenggipa manderang parakataha.
Chokpot-oni Sibbari-ona kilometre 28-mangsan dongaiachim indiba ia ramako re·na gita komibeoba konta gittamko nangenga ine kobor on·timgiparang parakataha.
Rongrokgre-oni Gasuapara-ona dakanggipa ramako tarigija galchipe donengani giminba jolni manderang, suk ong·gijaniko parakattokaha. Kobor on·timgiparangni aganani gitade, ia ramani ning·o Rongrokgre, Mitap, Mongsnagre, Mon Ading, Atabeng, Rongrongre, Karsigre, Chitimgre aro uandakgipa songrang dongachim indiba ia ramako tarichipe on·jaengani a·sel ia songrango donggipa manderang re·a doanirango bang·en neng·nikanirangko chagrongna nangtokskaengahachim.
Ia obostarangni gimin Chokpot constituency-ni MLA Lazarus Sangma-o sing·sandiaton, uni constituency-ni manderangna kamrangko ka·anio ua sorkarioniko maming dakchakanirangko man·jaenga ine an·tangni suk ong·gijaniko parakataha.