SHILLONG: Batanggimin bilsi bongani gisepo nisie galanggipa kamrangko namatna man·gipa sorkariko rikna gitasa a·dokni manderang, an·tangtangni dilgipako seokaha ine Sombar salo, Songsak-ni TMC MLA Dr Mukul Sangma parakataha.
Khasi Chief minister-ko songchina badiaba badiaba dolrangni dabienggipani bidingo janapatengon, “Ian sawa chief minister ong·gen, uni kattade ong·ja aro angni chanchiani gitade mitam manderangsa iako ong·gija dake ra·enga. Damgittam a·brini manderang ku·cholsan ong·e, manderangni namgnina aro a·dokko chel·chakna gitasa an·tangtangni dilgipako seoke watataha aro iasa mongsonggipa kattade ong·a,” ine Sangma parakataha.
A·dokni manderang, dingtanganiko nikna gita ka·oksiani gnangsa ia election-o dilgiparangko seokahachim ineba Sangma parakataha.
“Manderangni namgnina aro a·dokko chel·chakna ine aganengon, batanggimin bilsi bongani gisepo manderang, pilakni gitan ong·gija dakanirangko nikna man·aha aro iako an·ching songbadrangosan ong·aigija TV aro social media-rangoba nikna man·aha,” ine Songsak MLA aganaha.
Manderangni nangnikanirangko ma·sichakaniara political dolrangni daito ong·jachimma ineba Sangma sing·doataha.
“Manderangni namgnina aro a·dokni manderangko chel·chakna gita seokako man·gipa political dolrang an·ching manderangni nangnikanirangko nina nanga. BJP-koba niatbo, uamang a·doko tangka paisa jakkalani gimin ku·rang on·jachimma? Ma·mongo BJP-ko dilgiparang an·tangtangan, Meghalaya a·dokko a·songo tangka cha·batsranggipa ine matnangahachim. Indide ia kamrangko namataniara sani kam ong·engachim? Manderang ku·rangko on·aha aro dilgiparangko seokaha. Uni gimin seokako man·gipa politician sakantian iako ma·sie kam ka·na nangachim,” ine Sangma aganaha.
UDP aro PDF dolrangni NPP-chi dilenggipa sorkario bakrimangahani gimin janapatengon, ia pilakan politics-ni kamrangsa ong·aia aro iani biteko adita somoirangni gisepon nikna man·aigen ine TMC-ni dilgipa parakataha.
NPP-chi dilenggipa MDA 2.0 term matchoten tangbanggenma ine sing·on, iako uamang da·o mikkang salrango aro jarangni gisepo nichengna nanggen ine Sangma parakataha.