SHILLONG: Meghalaya a·doko National People’s Party (NPP)-chi dilenggipa MDA 2.0 sorkario bakrimaniko on·ahani gimin BJP-ni mitam dilgiparang kusi ong·jaenga ine kobor on·aha.
Kobor on·timgiparangni u·iatani gitade, gital sorkariko rikna NPP baksa bakrimahani gimin BJP-ni bang·bata dilgiparangan, ma·mongni BJP dilgiparango kusi ong·gijaniko paraktokaha.
NPP baksa bakrimna gita Independent MLA-rangba sikanirang dongjaengachim indiba BJP-ni dilgiparang didiahani giminsa Independent MLA-rang NPP baksa bakrimaniko on·aha ineba BJP-oni kobor on·timgiparang parakataha.
“A·bachengode UDP aro PDF dolrang NPP baksa bakrimjaengani gimin BJP-ni MLA sakgninan Cabinet-o biapko on·na miksonganirang dongachim indiba jensalo UDP aro PDF dolrang bakrimeaha, unon BJP-ni MLA saksanade Cabinet-o biapko on·gija MLA saksanasan biapko on·aiaha,” ine BJP-oni kobor on·timgiparang matnangataha.
Conrad-ni sorkario nichanggalako man·enggipa BJP MLA saksako da·o MDA 2.0 sorkario bakrimaniko ra·pilchina gita BJP-na kam ka·giparang diditokskaengaha ineba kobor on·aha.
Sorkario ong·ana bate opposition-o asongon nambatgen ineba BJP-ni mitam dilgiparang parakataha.
BJP dolsa NPP-na skanggipa bakrimaniko on·ahachim ine janapatengon, da·o BJP-kon NPP sorkari watchanggale an·tangtangsa bilo ong·skana jotton ka·engaha ine BJP-ni mitam dilgiparang parakataha.
Indake ong·engon, sorkariko rikanio BJP-ko nichanggalenga ine BJP-ni dilgiparang, ma·mongni dilgiparang baksa agangrikenga aro BJP-ni MLA-rang, je somoioba NPP-chi dilenggipa sorkarioni an·pilnaba gnang ine kobor on·timgiparang parakataha.
Batanggimin bilsirangoba BJP, NPP-chi dilenggipa MDA sorkariko tangka paisa jakkalsreta ine matnangenba, sorkario bakrimaniko ra·pilna ka·mikkenatahachim indiba term matchotaona kingkingan MDA sorkario bakrimaniko ra·piljahachim ine nikskana man·enga.