TURA: Pagitchamrangni Job Reservation Policy-na soi ka·grikanichisa Meghalaya a·dok ong·baaha aro ia Job Reservation Policy-ko da·o taridapna jotton ka·genchimode, a·doko songdongenggipa jatgittamni gisepo meligrikgijanirang ong·katnaba gnang ine Tura-ni Garo Graduates Union (GGU) mikrakataniko on·angaha.
Iani bidingo a·dokni Chief Minister Conrad K Sangma-na sedoatengon, Meghalaya a·dokni mongsonggipa jatgittam, chong·motan Khasi, Jaintia aro Garorangni dilgiparang, a·dokko man·chengani somoion ia job reservation policy-ko ja·rikna soi ka·grikaha aro untalan ia jatgittamni gisepo, ia reservation policy-ko ja·rike tom·tomao songdong a·chabaengachim indiba da·o badiaba badiaba dolrangni dabiengani gita ia job reservation policy-ko taridapna jotton ka·genchimode, ia jatgittamni gisepo meligrikgijanirang ong·atnaba gnang ine GGU-ni general secretary Dr MN Sangma parakataha.
Badiaba badiaba dolrangsa, dingtang miksonganio ia job reservation policy-ko nipiltaichina aro taridapchina dabienga ine janapatengon, a·doko songdongenggipa jatgittamni skia man·ani, man·e cha·ani aro janggi tangani bewalo pangchakesa a·dokni gitcham dilgiparang ia job reservation policy-ko tariaha ine GGU-ni general secretary parakataha.
“Chengonin A·chikrang, Khasi aro Jaintiarangna bate pilakni gitan ja·manchakbatgipa ong·achim aro da·omangba A·chikrangni janggi tanganio cholrang komibatani a·sel ia jatgittamni gisepo ja·manchakbatgipa ong·kuenga ine nikna man·enga. Meghalaya a·doko Garo Hills-an lekka porani gita aro pilakni gitan ja·manchakbatgipa ong·engani gimin Khasi aro Jaintiarang baksa apsan bak rengsiko man·pana gitade skango pagitchamrangni tarigipa Job Reservation Policy-kon da·oba ja·rikna nangkuenga,” ine Dr Sangma parakataha.
Meghalaya a·dokko man·chengaonin Job Reservation Policy donggenchimoba ia niamko kakket aro bebeo ja·rikjahani a·selan A·chikrang, an·tangtangni man·na nanggipa bak rengsiko tik ong·e man·jaha ine janapatskaengon, iani giminsa Meghalaya a·doko songdongenggipa pilak Tribal jatrangnan apsan bak rengsiko tikatna gita Meghalaya High Court, roster system-ko ra·gatchina hukum on·aha ine GGU-ni general secretary parakataha.
“Meghalaya a·doko da·o ong·enggipa job reservation policy-ara a·dokni pilak jatrangnan apsan bak rengsiko on·na gita nambatgipa niam ong·enga aro iako maming dakeba dangtapgija donna nangenga. Ia reservation policy-ko taridapna jotton ka·genchimode ku·mong nangrime songdongenggipa Tribal jatgittamni gisepo meligrikgijanirang ong·katnaba gnang. Uni gimim a·doko tom·tomani aro namroro silroroaniko rakkiangkuna gita anga GGU-ni pal, da·o dongenggipa job reservation policy-ko taridapgija donangkuchina mol·molenga,” ine GGU-ni general secretary Dr Sangma parakataha.