SHILLONG: Shillong songjinmani Polo-o gital dake taridapenggipa JN Sports Complex, indoor stadium aro First Ground-ko Budbar salo, a·dokni Chief Minister Conrad K Sangma, re·ange nieaha.
Ia Jawaharlal Nehru stadium-ko taridapna gita Meghalaya sorkari, gong kror 34.5 tangkarangko chame on·ahachim ine nikna man·a.
Ia JN Stadium-ko 1980 bilsimango rikchengahachim aro da·o bilsi 30-ni ja·man ia stadium-ko a·gilsakni gipin stadium-rang gita ong·atna taridapengahani gimin ian a·dokna namen jakkaltobegipa stadium ong·gnok.
Ia JN Stadium-ko taridapenggipani bidingo social media-o jinmana parakatengon, ia stadium-ko FIFA aro international standard-ni gadang ong·atna da·o taridapengaha aro iano ong·telaigipa samsirangko chaatna bitchilrangko ge·aha ine Chief Minister parakataha.
Ia stadium-o asongchakani biaprangkoba dam 30,000-ona bariatgnok aro ia stadium-o kal·susaenggiparangnaba pilak nanga cholrang donggen ineba ua parakataha.
Ia stadium-ko taridapani kamrang ta·rakengaha ine janapatengon, ia stadium-ko taridapani matchotahaode Meghalaya a·dokba international aro national level-ni kal·susaanirangko sokachakna man·gnok ine Chief Minister parakataha.
