U·IATTIMGIPAONI
SHILLONG: A·doko Secretariat office-ara chief minister, cabinet minister-rang, IAS officer-rang aro pilak dal·dalgipa officer-rangni kam ka·chakgipa office ong·e mongsongbatgipa office ong·genchimoba mitam manderang, Secretariat-o jabolrangko galan baksana ong·gija kamrangko ka·enga ine mikrontangchi nikgipa manderang matnangataha.
Kobor on·timgiparangni u·iatani gitade, politics dilgiparangko aro officer-rangko Secretariat-ona salange, garirango sengtimna nanggipa mitam manderang, ia biapo jabolrangko galan baksana kragijagipa kamrangko ka·enga ine nikna man·aha.
Adita salrangna skangsan, Secretariat building-ni a·palo donggipa nalarango chu botolrangko gale donangako nikna gita man·aha aro ian Secretariat-na namen nitogijaniko ra·baani ong·aha.
Mitam manderang, jemangan an·tangtangni nokgiparangko Secretariat-ona salbaengachim, uamangoni mitamde Secretariat a·palo skatang su·buanirangkoba nikna man·aha ine kobor on·timgiparang parakataha.
Adita salrangna skang, Secretariat-ni gate damsao donggipa step-o mande saksani maming mande ra·ani gri skatang ta·makku ringanikoba nikna man·aha ine kobor on·timgiparang parakataha.
Iandakgipa obostarangko minister-rang aro officer-rangde nikjaengnaba gnang ine janapatengon, Secretariat-o donggipa bang·a toilet-rangon rongtalatani bosturang dongjae, bang·a biaprangon chaktogijagipa bibarangko man·enga ine kobor on·timgiparang matnangataha.
Indake ong·engon, Secretariat-o garirangko donchakna gita biaprang chu·ongjaengani giminba bang·a manderangan suk ong·gijaniko parakattokaha.