U·IATTIMGIPAONI
SHILLONG: National Food Security Act 2013-ni ning·o kangal cholgrirangna merong aro uandakgipa ma·manti cha·ani bosturangko on·enggipani bidingo manderangna ma·siate on·na gita Meghalaya sorkarini, Food, Civil Supplies & Consumer Affairs department, ‘Food Security’ campaign-ko a·bachengataha.
Ia bilsio Food, Civil Supplies & Consumer Affairs department, Minister Comingone Ymbon-ni dilanichi, NFSA-ni kamrangko nambatatna aro darangkoba okumu donjana gita, manderangni man·na nangenggipa cha·ani bosturangni bidingo ma·siate on·na ia program-ko a·bachengataha.
Ia Food Security campaign-ni bidingo a·dokni Food, Civil Supplies & Consumer Affairs Minister Comingone Ymbon, kobor ra·timgiparangna talate on·angengon, NFSA 2013-ni ning·o ra·gatgipa dingtang dingtang niamrangni bidingo manderangna ma·siate on·na gita ia department, media-rangko jakkalna cholrangko nienga ine Minister Ymbon parakataha.
NFSA-ara a·songni manderangna cha·anirangko on·na gita sorkarini ra·gatgipa niam ong·e, cha·anirangko man·aniara manderangni bilan ong·ani gimin ia campaign ba program-ko ong·atanichi manderangna uamangni bilrangni gimin talatanirangko on·anggen ineba Ymbon parakataha.
Minister-ni parakatani gitade, National Food Security Act-ni ning·o, Antyodaya Anna Yojna (AAY), Priority Households, ‘One Nation One Ration Card’, Aadhaar Seeding aro uandakgipa kamrangni giminba ia campaign-chi manderangna talatanirangko on·anggen.
‘Food Security’ campaign-ni bidingo Khasi aro Garo ku·sikrangchi tarigimin music video-rangkoba oprake on·angjolaha.