SHILLONG: 2022 bilsio gital kuligipa West Khasi Hills a·jani Rimulian C&RD Block-ko da·onan chalaichipkujaengani a·sel songni nokni manderang maming namgnirangko man·tokjaenga ine Rambrai-Jyrngam constituency-ni MLA Remington Gabil Momin, an·tangni suk ong·gijaniko parakatenba, jolo songdongenggipa manderangni namgnina ia block-ko ta·raken chalaichina sorkariko didiataha.
“Da·ona kingkingan Rimuliang Block-na biapkoba tik ka·kujaengani gimin Deputy Commissioner ta·raken iani bidingo hearing-ko dakna nanga. Ia gital block-ko da·onan chalaichipkujaengani a·sel songni nokni manderang maming namgnirangko man·jaenga,” ine Momin parakataha.
Ia gital Rimulian C&RD Block-ko chalaichipkujaengani a·selan ia block-ni pilak scheme-rangkon Mawshynrut aro Nongstoin C&RD Block-rang gitasa ra·gate on·kuenga ineba Momin parakataha.
Momin-ni aganani gitade, ia gital block-ko kuliani bidingo 2023 bilsini Assembly election-na skangan parakatahachim indiba ia block-ko da·onan chalaichipkujaengani gimin uni constituency-ni ning·o donggipa manderang suk ong·tokjaengachim.
“Iani bidingo anga antignina skangan a·dokni C&RD Minister baksaba agangrikaha aro Rambrai baksana Nongstoin block-rangni gisepo ma·ekatna nangenggipa songrangkoba see on·manaha,” ine Rambrai-Jyrngam constituency-ni MLA aganaha.
Iani bidingo a·dokni C&RD Minister AT Mondal-o sing·sandiaton, a·dokni pilak gital block-rangna sorkari, bakan administrative building-rangko rikna siengahani gimin ia pilak block-rangon kamrangko ka·na a·bachenggnok ine parakatskaaha.
2023 bilsini Assembly election-na skang NPP-chi dilenggipa MDA sorkari, damsku gital block-rangko kulie on·ahachim indiba ia block-rangoni bang·batan da·ona kingkingan kamrangko ka·tokkujaengachim.