SHILLONG: New Shillong Township-o rikenggipa gital Assembly building-ni kamrang da·o matchotangengahani gimin Meghalaya a·doko bilsi 24-na Assembly building-ko man·na sengani da·o bon·na siengaha.
Ia gital Assembly nokni protchongko songani kamrang adita salrangna skangsan matchotaha aro da·o ia protchongni kosako minar-ko songnasan nangaiaha.
Sorkarioni koborko on·ani gitade, ia minar-ko India a·songni gipin biaposa tariataha aro ia minar, Mongolbar salode Shillong-ona sokbagnok.
Ia minar, Shillong-ona sokbaahaon, iako April jani bon·angachibara songnaba gnang ine kobor on·timgiparang parakataha.
Ia nokni a·palrang da·o matchotangengahani gimin ia gital Assembly building-ni ning·o donggipa bakrangkoba tarina a·bachengskagnok.
Interior work ba ning·ani kamrangko ka·na gita New Delhi-ni company-ko seokaha aro ia company, bakan kamrangko a·bachenggnok ine kobor on·timgiparang aganaha.
Ia nokni bimangko Badri Rai & Company (BRC) tariskaahachim.
Meghalaya Assembly-ni gitcham building-ko 2001 bilsini January 9 tariko wa·al kamgopahachim aro untalan ia gital Assembly nokko rikna gita dingtang dingtang biaprangko seokahachim.
A·bachengode ia gital Assembly nokko, Tara Ghar aro Upper Shillong-oba rikna tik ka·ahachim indiba bilsi 20-mangna sandiani ja·man sorkari ia Assembly nokko New Shillong Township-ni Mawdiangdiang-o rikchoteaha.