TURA: Adita salrangna skang, Seyamal Koch minggipa mande saksa, A·chik jat gimikko man·gope, ku·wattogija kattarangchi social media-o post ka·atahani gimin ia mandeni kosako aro uni kamko Meghalaya Koch Students Union (MKSU)-ba raken jegalataha.
India aro Pakistan a·songni gisepo so·sojengjeng ong·enggipani bidingo adita salrangna skang A·chik chadambe saksani a·songtangko chonnike, Pakistan a·songna chakpaaniko social media-o parakatani ja·man, iani bidingo A·chik jat gimiko man·gope, Seyamal Koch minggipa mande saksa, ku·wattogija kattarangchi social media-o post ka·skaahachim.
Indake ong·engon, ia mandeni iandake jatgimikko ku·wattogija kattarangchi saue social media-o post ka·atahani gimin ia mandeni kosako aro ia mandeni kamko MKSU-ba raken jegalataha.
“Iandake jatni kosako matnange social media-o post ka·anichi jat gimikna gisik saataniko ra·baaha aro ian dingtang dingtang jatrangni meli nangrime donganiko pe·ani gitaba ong·aha. Iandake chanchininggija kamko MKSU raken jegala aro chinga MKSU-ni gita tom·tomani, ku·mong nangrimani aro Tribal-rangna on·gimin bilrango bebera·gipa ong·e badiaba jatni kosako mitchigrikani aro ma·sisretgrikaniko ra·bana jotton ka·aniko raken jegala,” ine MKSU-ni president Kandarpa Koch parakataha.
Iani bidingo sandirokenba dos dakgipa mandeni kosako niamo pangchake ja·kurangko de·china didiatengon, social media-rangko jakkalanio simsake jakkalchina gita MKSU, manderangko, mongsongbate chadamberangko mol·molataha.
Meghalaya a·doko dingtang dingtang jatrangni gisepo ku·mong nangrimaniko rakkiangkuchina gitaba MKSU mol·molataha.